Afayáivos

Esti ye’l mi primer artículu nel blogue. La mio intención con esti blogue ye publicar articulos curtios sobre temes venceyaos a la Xeografía, l’urbanismu, la ordenación del territoriu y tamién sobre cartografía y webmapping.

Fáigolo porque dende va años uso redes sociales que voi dir abandonando pocu a pocu y quería tener un requexín na web pa siguir espardiendo reflexiones, idees que la xente pueda alcontrar interesantes.

Asina qu’equí tamos, inaugurando un blogue gracies al repositoriu github y a la plantilla minima. El propósitu ye dir tamién publicando los artículos na red social Mastodon y rebotalos a Bluesky.

Periurbania ye’l nome del blogue. Esto ye porque tengo dalgo investigao sobre los paisaxes periurbanos. Ye un tema que interesame abondo y como quier que’l centru d’Asturies ta lleno de esti tipu paisaxes, diome por nomar al blogue Periurbania, como si fuera un país dentro d’otru, sicasí, esti ye de llendes bien borroses.

El blogue ye bien simple, una páxina d’iniciu, una biografía y un archivu. Na parte baxa tan los enllaces a otres redes. De momentu na más. Col tiempu ya se verá si camudo daqué.

Pa finar, pero nun menos importante, el blogue va tar n’asturianu. Tengo milenta razones pa facelo así, pero la más importante ye: porque me presta. Asina que garrái sitiu y afayáivos.