Cocines escondíes, supermercaos pantasmes

Nos caberos años ta espardiéndose un modelu de negociu que puede camudar abondo’l paisaxe urbano nel futuru. Son les cocines escondíes y los supermercaos pantasmes. N’inglés, dark kitchen y ghost supermarket. Delles empreses tán llantando estos negocios en baxos comerciales cola cuenta de sirvir pidíos y comíes a casa nun tiempu máximu de un cuartu de hora. Caracterícense porque nun tienen un mostrador nin tán pensaes para atender al públicu, a cencielles cocínase a toa velocidá o se cuerre per ente los pasiellos cola ayuda de tabletes electróniques y gps p’alcontrar nes estanteríes los productos solicitaos.

Pel momentu n’Asturies, creo, nun tenemos nengún supermercáu pantasma (cocines sí), cola nave de Amazon ya ye bastante, pero viles en ciudaes de tamañu similar a les nuestres como Granada y Bilbao, d’onde son les semeyes.

Supermercáu pantasma. Granada.

Supermercáu pantasma. Bilbao.

Los cambeos nel paisaxe dicen abondo de cómo nos portamos como sociedá. Nesti casu lo qu’anuncia esti cambiu del paisaxe urbano ye la velocidá cola que queremos consiguilo tou y, de pasu, como resultáu indirectu ta la externalización de la precariedá pola nuesa supuesta falta de tiempu.

Mientres les cais pierden vida, el pequeñu comerciu replazase por una flota de personal de repartu. Pa la reflexón y l’alderique queda comprobar finalmente si esta va ser la única ventaya del modelu de la ciudá de los quince minutos.

Cocina escondía. Uviéu