Dende va unos meses toi viendo autocaravanes aparcaes nes cais de les periferies urbanes. Al principiu pensé que yeren persones que nun teníen onde dexales y que, en cuenta teneles nun garaxe, aparcábenles na cai. Pero dempués de repetir les mismes rutes varies vegaes decatéme de que nun taben aparcaes, yera xente que vivía nelles. Nun yera xente que taba de pasu, turistes o viaxantes, ye xente que vive ehí dafechu tolos díes.

Al principiu respigueme un pocu. Pensé que esti asuntu yera cosa namás de sitios como les Illes Balears, ya que saliera na tele un reportaxe d’una montonera xente que vivía asina porque nun podíen pagar los precios que-yos pedíen pol alquiler, sobre too a cuenta del efectu que tenía el turismu nos precios de la vivienda nel archipiélagu. Lo que nun contaba yera con encontralo a la puerta casa. Son autocaravanes, roulottes, motorhomes, que se cuenten colos deos de la man, tampocu ye que seyan munches, pero mes a mes el númeru d’elles crez.

La mayoría tan asitiaes na periferia de les ciudaes, en barrios que tienen cais asfaltaes, aceres, lluz y tolos servicios básicos de redes de saneamientu o de telecomunicaciones, pero que nun tienen cases. Namás hai parceles, solares. Son los barrios que quedaren a mediu facer por cuenta la crisis del 2008.

Nun tiempu nel que los precios de la vivienda crecen tantu, nel que pa muncha xente ye imposible pagar un alquiler o nel que nun hai quien ponga remediu a la falta de vivienda pública, paez qu’hai xente que diose y decidió vivir nuna autocaravana. Lo más ablucante ye que precisamente nestos barrios que taben destinaos a acoyer nuevos vecinos, a facer pisos que nun se construyeron tovía, los únicos habitantes qu’hai seyan los que como los cascoxos lleven la casa a cuestes.

Autocaravanes na periferia d'Uviéu

Autocaravanes na periferia d’Uviéu.