Diba tiempu que nun lleía un llibru de Xeografía Urbana que me prestase tantu. Non solo esplica bien nidio como evolucionó la ciudá de São Paulo, sinón qu’en poques páxines, unes cien, da tou tipu de detalles sobro la importancia del mediu físicu, de lo económicu y lo social, de les decisiones polítiques y sobremanera, de les decisiones del planeamientu urbanísticu y qué influencia tien na configuración del texíu urbano y les sos implicaciones sociales.

Portada del llibru

Sintetizar tantes coses nun llibru tan pequeñu sobro la ciudá más populosa de Llatinoamérica nun me paez nada fácil y l’autora, Raquel Rolnik, consíguelo, a la mio manera ver, d’una manera ablucante. Apenes hai 4 o 5 mapes o esquemes, abondos y cenciellos. El testu nun ta estráu de cites o referencies, sinón que se presenten a la fin. Foi un prestor lleelo, amás tien un prólogu d’un músicu local, Emicida, que contribúi a rellacionar tou, xeografía, desigualdá, urbanismu, cultura y sociedá. Una ayalga.

Creo que si tuviera tornáu al asturianu sería una llectura obligatoria, pero lleelo en portugués tamién tien el so encantu y la so importancia, porque asina pueden aprendese coses como la pixação, los rolezinhos, los terreiros, y tantes coses qu’esta ciudá, global, desigual y cosmpolita ufierta. Dende la última casa galpón na favela recóndita construyida illegalmente nes llamuegues hasta la esllumante concentración de rascacielos, centros comerciales y condominios zarraos nes marxes del ríu Pinheiros como reflexu del capitalismu global y los sos mecanismos pa tresformar les ciudaes. A última hora, un llibru que, en cierta midida vien del futuru, porque lo que socede en ciudaes como São Paulo tarde o tempranu lléganos a les ciudaes más pequeñes, una llectura de les que motiven.